Lu trenu a vapuri

Descrizione

LU TRENU A VAPURI

Curri, lu trenu a vapuri,

vecchiu e putenti,

curri pi' la so' ferruvia,

senza chiù firmarisi a li stazioni,

purtannusi dintra

tutti li sonni mei

e tutti li spiranzi

di fari nasciri in tutti li genti

lu disiu di 'na giustizzia vera,

d'amuri, di paci

e d'allianza suciali.

Curri lu trenu e sbuffa,

arrancannu cu lu scrusciu di ferru vecchiu,

curri lu trenu e frisca,

cu lu sonu forti ca fa tuuuuu,

curri lu trenu e jietta fumu,

certi voti biancu comu la nivi

e avutri voti nivuru comu lu carvuni.

Biancu, ca sunnu li me' spiranzi

e li disideri di lu me' cori,

nivuru, pi' li risposti ca duna

stu munnu nfittatu.

Curri ancora, curri sempri, trenu miu,

e jietta sempri lu fumu biancu!